विमानस्थल भन्सारलाई घाँडो भयो जफत गरेका रक्सी

  •  
  •  
  •  
  •  
  •  
  •  
  •  

केही महिनाअघि भन्सार विभागको निर्णयअनुसार विदेशबाट फर्किने यात्रुले एक लिटरभन्दा बढी रक्सी ल्याउँदा त्यसलाई जफत गर्न थालेपछि भन्सार अधिकारीहरू दंग परेका थिए । त्यही रक्सी अहिले त्रिभुवन विमानस्थल भन्सार कार्यालयका लागि घाँडो बनेको छ ।

त्रिभुवन विमानस्थल भन्सार कार्यालयले विदेशबाट फर्किने यात्रुबाट जफत गरेको ५ हजार ८७७ बोतल रक्सी बेच्न सकेको छैन । भन्सार कार्यालय गौचरले कात्तिक १८ गते पहिलो पटक सूचना निकालेर लिलाम गर्न खोजे पनि बिक्री नभएपछि मंसिर २५ गते पुनः अर्को १५ दिनको म्यादसहित अर्को सूचना निकालेको छ ।

भन्सार कार्यालयले विभिन्न १३ लट नम्बर दिएर निकालेको सूचनामा ५ हजार ८७७ बोतल रक्सीको न्यूनतम मूल्य १ करोड १२ लाख ६९ हजार ३९० रुपैयाँ तोकेको छ । कार्यालयले एयर यात्रु जाँचपास तथा सहजीकरणका क्रममा जफत भएका मदिरा बेच्न पटक–पटक सूचना जारी गरिरहेको छ ।

विदेशबाट फर्कने नेपालीले आफैंले उपभोगका लागि वा साथीभाइका लागि उपहार भनेर विदेशका भन्सारमुक्त पसल (ड्युटी फ्री सप)बाट ल्याउने गरेका रक्सीमाथि सरकारले यहाँका ठूला रक्सी व्यापारीको आग्रहमा हस्तक्षेप गर्न थालेको हो ।

सरकारले झिटीगुन्टा भारी आदेशअनुसार एक लिटरभन्दा बढी रक्सी ल्याउन नपाउने भन्दै गत वर्ष यही समयदेखि विदेशबाट यात्रुले ल्याउने रक्सी जफत गर्न थालेको छ ।

सरकारको यो व्यवस्थाबारे थाह नपाएका यात्रुले आफूले भन्सार तिरेरै थप परिणामको मदिरा छुटाउन पाउनुपर्ने तर्क गर्ने गरे पनि भन्सार अधिकारीहरूले खोस्ने गरेका छन् ।

त्यसरी १ देखि १३ लटसम्म खोसिएका झन्डै ६ हजार बोतल रक्सी भन्सारका लागि घाँडो भएको हो । लामो अवधिसम्म ड्युटी फ्रिका रक्सी नबिकेपछि केही समयअघि तत्कालीन नेसनल ट्रेडिङले आयात गरेका रक्सीसमेत उपभोग अवधि सकिएको भन्दै नष्ट गरिएको थियो ।

(Visited 1 times, 1 visits today)

Leave a Reply

Your email address will not be published. Required fields are marked *